يقين الشياب تفطر قلوب الاردنيين في رسالة بعد وفاة والدتها وشقيقيها بحادث مروع - تفاصيل مؤلمة

الوكيل الاخباري - مجدي الباطية - رثت الفتاة يقين الشياب والدتها المعلمة المرحومة ايناس الشطناوي وشقيقها الدكتور عمر الشياب وشقيقتها مبين التي تبلغ من العمر 3 سنوات الذين انتقلوا الى رحمة الله تعالى اثر حادث سير مروع على طريق المفرق يوم السبت.

 وتداول الرسالة الاف الاردنيين عبر مواقع التواصل الاجتماعي، حيث كانت المعلمة الشطناوي تنوي الانتقال لمنزل جديد انتهت من بناءه حديثاً بعد تعب سنين طويلة.

وكان موقع الوكيل الاخباري نشر تفاصيل وفاة الشاب عمر الشياب ووالدته وشقيقته قبل أن يؤدي امتحانه في جامعة العلوم والتكنولوجيا يوم وفاته ، نتيجة لحادث مّروع وقع على طريق المفرق ، صباح السبت .

 حيث كانت والدته  مُصرّة أن توصل ابنها عمر إلى الجامعة ، ولكن القدر كان أقرب إليهم، فماتت الأم "ايناس" وابنها"عمر"،  وشقيقته  التي تبلغ من العمر 3 أعوام .

 وتوشّحت مواقع التواصل الاجتماعي بصور المرحوم عمر ، ونعاه زملاؤه بعبارات الوداع ، كما ونعى زملاء المعلمة إيناس زميلتهم  .


وقالت يقين في رسالتها :

بيت مين هاد؟

شهرين وكنا حننتقل عليه

تعبتي كثيييير يا امي ويا صاحبتي وصبرتي وتحملتي كل اشي مشاننا احنا مشان ولادك اللي كانو أغلى اشي عندك 

دايما كنتي بتحكي انه ما حتدخلي هالبيت وفعليا يا امي ما دخلتيه! ورحتي عند ربنا واكيد بيتك فوق احلى

مش لو استنيتي شوي مو ضايل كتير عليه كلهم كم قطعة اثاث وبخلص

شفا بدران حفظتك والله كل يوم كنت بتروحي عليه 

قبل ما تنتقلي عند ربنا بيوم.. يوم الجمعة الصبح رحتي عليه نضفتيه وسقيتي الشجر..

اخوي محمد ومبين الله يرحمهم رح يشفعولللك ورح يلاقوكي عباب الجنة.. طيور من طيور الجنة يا اميي

المطبخ كم يوم وبكمل ع اساس! ما رح يندخل هالبيت بدونك وما رح يتكمل اثاثه

دايما بتدخلي التميز معي.. بنلبق جلابيب مع بعض وبتهمك دراستي كثير وبتتابعي علاماتي.. والله يا امي اكثر من مرة حكيتلك اياها.. اني انا بدرس عشانك انتي بس عشان افرحك وترفعي راسك بالمدرسة بتعب مشانك بس! ع التوجيهي رحتي وتركتيني باكثر وقت لازم تكوني معي فيه تركتيني ما رح اقدر اكمل بدونك ولا رح ادخل التميز من بعدك ولا حتى اتحمل اشوف معلمة قاعده بالمرسم غيرك 

مبينتي، الاخت الوحيدة الي.. رتبتي العابك قبل ما تطلعي ع اربد..

طب شو بالنسبة لغرفتك اللي بالبيت الجديد، في غرفة كاملة بس للعب صح؟ كنتي مكيفة عليها رحتي وراحت ورح تضل فاضية

طب مش كنتي بدك تسجلي بمدارس المحمدية؟ عجبتك كثير وقلتي بدي ادرس فيها

قبل يومين شريتي انتي وامي اواعي العيد فستانك مين حيلبسه؟ كنتي كثير مبسوطة فيه.. يا امي شريتي جلباب للعيد وشريتي فستان قلتيلي هاد للمناسبات

ليلة السبت طلبتي اندومي يا مبين وعملتلك وكان آخر اشي بتوكليه،، قلتيلي يلا، يا يقين ع ال١٢ بتعمليلي ما تأجليها لبكرا عشان ما رح اكون موجودة ورح انزل ع اربد ورحتي عند ربنا والله ما رح اكله بدونك

كنتو تودعو فيي وانا مش حاسه 

شفت امبارح السيارة، من ورا كنت حاطة العابك فيها كنت بتلعبي وقت صار الحادث.. كنتي لابسة بوتك وشنتتك اللي ما صارلهم اسبوع عندك

وجعوكي صح؟ كيف تحملتي الضربات هاي؟ الله يوجع قلوبهم يا عمري.. بتعرفي اني حممتك انتي وامي صح؟ بايدي حممتكم وحملتكم ولبستكم الكفن اكيد سمعتوني وشفتوني.. كنتو عبارة عن ملائكة والله

السبت الصبح قبل خا تطلعي يا امي قلتيلي انتبهي ع حالك وما تطلعي بتاكسي واطلعي بباص بخاف عليكي 

انتو كثير مبسوطين ومرتاحين هسا اكيد بالجنة والله بالجنة كثير ناس حلموا فيكم وانكم مبسوطيين وهالاشي مصبرني والله استودعكم الله الذي لا تضيع عنده الودائع

الله يرحمكم ويغفرلكم ويثبتكم عند السؤال ويصبرنا ع فراقكم

اظهار أخبار متعلقة

اظهار أخبار متعلقة